Albanian
македонски
English
Lajm i keq për prindërit që përdorin pajisjet teknologjike për të disiplinuar fëmijët
E kemi bërë të gjithë, pasi kemi provuar çdo lloj truku tjetër ndonjëherë na duket sikur momenti kur i vendosim fëmijës një pajisje teknologjike, është e vetmja zgjidhje për të gjetur pak qetësi.
Por duke përdorur këto pajisje smart si një shpërblim ose kur ja heqim fëmijës nga duart si dënim bën që fëmija ynë të kalojë më shumë kohë para ekranit. Kështu thonë studiuesit në Universitetin e Guelph.
Ky studim vjen në një kohë kur ka shumë konfuzion dhe shqetësim rreth përdorimit të ekraneve të pajisjeve smart. Për të ndihmuar prindërit të arrijnë një të mesme të artë, shoqata e publikuesve amerikanë kanë ofruar udhëzime për kohën e rekomanduar për fëmijët para ekranit.
Për këtë studim, hulumtuesit shqyrtuan ndikimin e praktikave të prindërimit në sasinë e kohës që fëmijët e moshës 18 muajsh deri në 5 vjeç kalojnë para ekraneve. Prindërit që morën pjesë në studim u pyetën sesi ata monitorojnë kohën e ekranit, kur fëmijët lejohen dhe nëse prindërit kalojnë kohë para ekraneve me fëmijët e tyre përreth.
Fëmijët shpenzojnë rreth një orë e gjysmë në ditë para një ekrani gjatë javës, dhe pak më shumë se dy orë në ditë në fundjavë, sipas hulumtimit. Dhe prindërit e tyre shpenzojnë rreth dy orë në ditë para një ekrani gjatë ditëve të javës dhe pak më shumë se dy orë e gjysmë në ditë gjatë fundjavave.
Shumica e prindërve raportuan se përdorin këto ekrane si një mënyrë për të kontrolluar sjelljen, veçanërisht gjatë fundjavave. Kjo mund të jetë arsyeja pse ne i shohim fëmijët të kalojnë mesatarisht 20 minuta më shumë në ditë para ekraneve në fundjavë.
Dhe fëmijët e prindërve që rrinë shumë me telefon apo tablet kalojnë më shumë kohë duke përdorur këto pajisje.
“Për prindërit e fëmijëve më të vegjël, kjo nuk është aq e zakonshme, sepse prindërit mund të përdorin pajisjet teknologjike kur fëmija është në gjumë. Por, kur fëmijët rriten, është e pamundur për prindin që të kalojë kohë para ekraneve të këtyre pajisjeve pa pasur fëmijën aty pranë”, thotë hulumtuesi i studimit Jess Haines.
Studimi gjithashtu zbuloi se fëmijët të cilët lejohen të jenë para tabletave apo smartfonëve gjatë darkës kalojnë më shumë kohë para këtyre ekraneve.
Ne jetojmë në një brez ku është e pamundur të shmangim tërësisht kohën para ekraneve të këtyre pajisjeve. Studimet si këto nuk kanë për qëllim t’i bëjnë prindërit të ndihen keq, por t’i informojnë ata rreth një dileme moderne, pasi para ekzistencës së këtyre pajisjeve prindërit as nuk duhej të shqetësoheshin rreth tyre.
Mos ia jepni telefonin fëmijës përpara kësaj moshe
Cilët prindër nuk kanë përdorur kurrë një telefon celular për të qetësuar një fëmijë që është shumë i lëvizshëm në restorant? Ose ta qetësoni pak përpara ndonjë vaksine apo ekzaminimi mjekësor?
Por, këto pajisje në fakt fshehin disa kurthe. Këtë e konfirmojnë ekspertët e Shoqatës Italiane të Pediatrisë, të cilët sapo kanë kryer një studim mbi këtë temë, të botuar në revistën italiane të pediatrisë dhe rekomandojnë të mos i japin tabletë fëmijëve para moshës dy vjeçare.
Për shumë prindër është një mjet argëtimi
Sipas të dhënave zyrtare, në Itali të paktën 80% e fëmijëve të moshës midis dy dhe pesë vjetësh janë në gjendje të përdorin smartfonët e prindërve të tyre. Për më tepër, si mund të ndodhte ndryshe, kur shumica e prindërve e përdorin këtë mjet për të shpërqëndruar fëmijët e tyre.
30% e bëjnë këtë që nga muajt e parë të jetës së fëmijës së tyre, ndërsa 70% presin për vitin e parë. Sipas hulumtimit, tabletët nuk duhet t’u jepen fëmijëve nën dy vjeç, sepse rreziqet për zhvillimin neuro-psikokognitiv janë shumë të larta.
Nga vitii dytë deri në vitin e pestë, pajisjet elektronike nuk duhet të përdoren për më shumë se gjysmë ore në ditë dhe nga pesë deri në tetë vjet kufiri maksimal është dy orë në ditë.
Kujdes ndaj përmbajtjes
Në të gjitha rastet është e domosdoshme të kontrolloni përmbajtjen që fëmijët kanë nëpërmjet tabletëve dhe smartfonëve. Prindërit duhet të sigurojnë që fëmijët të mos shohin imazhe dhe të mos kenë tekste të dhunshme, jo edukative ose të rreme, të cilat mund të jenë të pranishme në reklamat e aplikacioneve të shkarkuar nga prindërit ose videolojrat.
